Омакальг’анма инэллэчг’э крайик йилнин тайкыён эналлачг’ын тапечгыӈгиӈэпыӈ В. Черныш то инингивыӈ инэллэчг’ин Инэллэиччетык Р. Василевский, тит ычгынан нанг’ынчоччымавын лайвыгиӈын кояв’ъепэччатылв’ыныӈ.
Инэллэчг’э регионык тывынэн акметгиӈо гэтама ӈэлвылг’у Тигильский то Быстринский районык. Ыннею танвэтгыӈгиӈо келлаӈ тит амъел йиныплэпавык ӄояв’ъепгиӈо Камчаткак, мыев’ китыӈ опта яноткенано этгиӈо экономикак. В. Солодов эвыӈ, 2021 гэвэгиӈык кояв’ъепгиӈэтыӈ ганчоччымав’лэнав’ 300 миллионав’ пылв’ынто.
«Ӄояв’ъепгиӈо- яноткэнав’ вэтгиӈо Айгытӄыӈӄал, эчги ыннин вэтгиӈын ниччиг’эв’ китыӈ. Вэтатылг’а статистикак накокалэӈвоӈнав’ нымэлг’эв’ ӄояакммэтгиӈо, то гэтама, гамга ӈэлвылг’ык алваӈ валг’о ӄоягыннетгиӈо. Ӄутин иччетык нымэлг’эв’ гантывалэнав’ вэтгиӈо, ӄутинычгин мальнив’тылг’эв’. Мую мыткев’лаӈ, итылг’у в’эннятгиӈо пылв’ынтэпыӈ ныг’итикынэв’ йингычголавыӄ кояв’ъепгиӈо. Йиллыг’у пылв’ынтыв’эннятгиӈо кытаван ныг’итикынэв’ ӄояв’ъепылг’ыйикыӈ, меӈию ковэталаӈ ӈэлвылг’ык то коёналаӈ эмнуӈык, тит ычгынан нэнг’экмитикынэв’ нымэйиӈӄинэв’ вэтатвэлатгиӈо. В’отэныӈӄо тыков’алалатык йинчоччымавык лайвыгиӈо ӄояв’ъепэччатылв’ынэпыӈ виткукинэк кварталык 2021 гэвэгиӈык»,- эвыӈ инэллэчг’ын Камчаткакен.
Эчги Камчаткак ковэталаӈ 9 ӄояв’ъепиччету. Акметгиӈэпыӈ 2020 гэвэгиӈык ӈэлвылг’ылв’ынык накайтаӈнав’ мыкыӈ 43 тысячав’ ӄояв’.
Лайвыма Тигильский то Быстринский районыӈӄо инэллэчг’э крайик ёг’ынэн ӈыччеӄ ӄояв’ъепиччетыт ООО «Ӄояӈталг’ын» то ООО «Йиплэпав’гиӈо ӄоявэтгиӈыкэнав’». В’отэныӈӄо эв’лай эначгыпавылг’о Эналлаэччатыӈӄо Камчатский крайик.
Эчгыпо йинчоччымав’нэн С. Тынанто.