ГIалгIай паччахьалкхен университете дIайихьача «Битва умов» яхача яхьарашка дакъа лаца аьттув хилар тайп-тайпарча колледжашкарча дешархой. ХIара Iилма довзаргахьа дола хаттараш дар доакъашхошта кийчдаьраш. Атта да ала атта дацар, ховчоа, довзачоа хала а дацар! Кхаь даькъа йийкъа яр программа: хьалхарча шин юкъа хьалхабаьннараш кхоалагIча даькъа юкъе болхар. Духхьал уйла сихагIа йир мара кхы дашхаргахьа совлен низ бе безаш дацар доакъашхошта тийна хаттараш. Укх шера цу яхье котало яьккхар «Колледж сервиса и быта яхача» учрежденера баьхкача студенташа. Цар кийчо яьлга а, уж дешаргахьа дика кхеташ болга а гуш дар.
Шоайла кхы саг хьалха ца валийта лаьрхIар цар укх шера, духхьал хьалхара моттиг яккха уйла-нигат долаш. Заьзганаькъан Залина, Оздой Залина, Евлой Ева, Ведажнаькъан Лилия, ГIапаркхой Тухан — уж бар «КСиБ» аьнна тоаба вIашагIъеллараш. ХIаьта шоаш белгалъяьккха цIи шоай боча хиларга хьежжа, уж хьажар цу цIера сий лакхде.
Доккхийча совгIаташца безбир уж вIашагIкхетара хьалхалаттараша! Дешархой раьза бар шоай дакъалаца а, толам баккха а аьттув баьнна.
Новрузнаькъан Макка
№ 33 (12168), шинара, 5 март, 2019 шу / вторник, 5 марта 2019 года