Подмосковни шахьар Одинцове август бетта 2-11 деношка дIайихьача низъоамала яхьашка дакъалоацаш хиннача гIалгIай кагийча наьха лерхIам беш, цар сий деш вIашагIкхетар дIадихьар ГIалгIайчен керттерча шахьаре Магасе.
ГIалгIай мехкара бахача низъоамалхоша кхоъ награда енай цIа: шиъ лакхахьари, цаI лохераи. Никита Мельниковаца тоссавеннача Йовлой Мусас цу сахьате котало яьккхар, цу наькъаца жалтий-рима латара даькъе 97 кийла дозал долча латарах Россе чемпион хиларца. ХIаьта Оздой Бекхана дохьал латаш олимпийский чемпион Давит Чакветадзе вар, бакъда, гIалгIа дуккха а дикагIа кийчвеннавар цу наькъа. Финале тоссавеннача 87 кийла дозалах дошо майдалг йоаккхаш котваьлар из. 63 кийла долча дозалах латаш геза майдалг яьккхар Хучбаранаькъан Рустама.
Иштта коталонаш а яьха, вай мохк а, къам а эздийча оагIорахьа, денале дIагойтарца хьалхара моттигаш яьха цIабахкарах цар сий деш дар хинна вIашагIкхетар. ДIахо йодача хана а иштта денале шоай наькъ тIехьа къахьегаш дIабаха аьттув балба цар.
Матенаькъан Илез
№130-131 (12066-067), шоатта, 1 сентябрь, 2018 шу / Суббота, 1 сентября 2018 года