МоллагIа керда хьадеш дола хIама, боча а хьамсара а хул. Къаьнардар леладаьчул дикагIа а, эздигIа а леладу из наха, хIана аьлча кердача, цIенача хIаманца са а къердалуш, цунца чам а болаш къахьега дог доагIа вай. Бакъда, дукха ха ялале из кердадар къадолиташ а тишдолийташ а нийслу вай. Ишта Дала кхелла дийна адамаш да вай.
Керда хьахулача 2018-2019 дешара шера 1500 бер деша дIаховргдолаш цхьаькха йоккха керда ишкола хьаелларгйолаш я ГIалгIайче. Пенаш хьал а детта тхов IотIа а тилла йисте а яьнна тIера а чура а балхаш деш ба ишкола гIишлон болхлой.
Къилбаседа Кавказа гIулакхах вола Министр Кузнецов Леви, ГIалгIайчен Мехкда Евкуранаькъан Баматгире Юнусбеки баха хилар Дошлакъа-Юрта хьалъеш латтача 1500 бер деша ховргдолча цу №13 йолча йоккхача ишколага хьажа а цигара болх мишта дIабодаш ба ха а. Цу тайпара йоккха дешара гIишло шоллагIа я вай мекха. Хоза Iадат а хинна дIаотташ латт, цу тайпара гIишлош ГIалгIайчен доазон тIа хьалъяр. Хьахулаш долча дешара шера бераш чу а ийца эздича Iаьдалах болх бе йолалургйолаш я из ишкола.
Мехкал арахьара тIабаьхкача хьаьшашка моаршал хоатташ, уж ишкола йолча дIабугаш а юха накъа боахаш а Мехкдаьл совгIа ГIалгIайчен Халкъа Гуллама Тхьамада Йовлой Зелимхани, Правительства тхьамадан ЖКХ даькъе долча хаттаршкахьа гIонча вола Оздой Бек-хани, Дешареи Iилмани министр Къоастой Юсупи, Наьсарен шахьара да ТIумгIой Iалихани, иштта дешара гIишлон кулгалхойи, гIишло хьаьлъеш йолча организацен викалаши бар.
№13 йола ишкола 3 гIатах латташ, 4 дешара корпус йолаш: уж я 60 дешара кабинет, столовии, библиотекаи, йоккха актови зали, 4 спортзали йолаш йоккха гIишло я. Цу йоккхача гIишлон чудоагIача лаьттан тIа ишколан стадион а ба берашта ловза кийчбеш. Из керда дешара гIишло хьалъер дувзаденна да 2016-2025 шерашка ГIалгIайче гIолла керда юкъерча дешара моттигаш Iалашъерах йолча «Создание новых мест в общеобразовательных организациях Республики Ингушетия в соответствии с прогнозируемой потребностью и современными условиями обучения на 2016-2025 годы» яхача программах.
Ер юкъерча дешара гIишло кердача заман технологи кхоачамо дIадехаш дола хаттараш кхоачашдеш я. Ишколе йолаш я кизга телевизор онлайн-вещани а йолаш. Иштта актови зале мультимедиа-проектор а я вIаштIехьаяьккха. Цул совгIа, дисплейно-сенсорни ражах латта электронни табло а йолаш трибуна я.
Ишколан уйчешка гIолла а, дешара классашка гIолла а чакхваьлча массанахьа вIаштIехьайоаккхаш садоаха фо цIенагIа хургдолаш ультрафиолетови лампашца я Iалашо я. Ма хулла берий кхерамзле Iалашъяра тIехьа къахьегаш дIабодаш ба ишколера болх, цу чу деша дагIа дезача берий дай ноаношца дага а бувлаш.
Из йоккха ишкола хьалъе белгалъяь моттиг араюкъе гIолла хержа яц. Дошлакъа-Юрта керда фусамаш ехкача метте 700 гарга дезал баха, дIалаьрхIача хIара дезале ялхнега кхачалца бер а долаш. Цудухьа цу берий гаьна дIа-хьа аха дезаргдоацаш царна лаьрхIа хержа да из ишкола хьалъяь доазув.
Вайна дукханешта дагадоагIаш ма хиллара, дIадахача шера ГIалгIайчен керттерча шахьаре Магасе а ший дешара болх дIаболабир цу тайпарча 1500 бер дешаш йолча йоккхача ишколас. ХIаьта цу Магасе яьча ишкола хьахьожадаь ахча «Содействие созданию в субъектах Российской Федерации новых мест в общеобразовательных организациях на 2016 – 2025 годы» яхача проектах дар.
Цу ишколас дешара болх дIаболабаь дукха ха еце а деша дагIаш дукха бераш да цига, дешар а тоъам болаш дика да цу чу таханарча дийнахьа. Болх болабаь цхьа шу а даьннадац, бакъда бераш дешарах кхеташ а кхетам лакха болаш а да. ХIаьта дIахойодача хана кхы а дикагIа цар шоай болх кхоачашбар догдоахаргда вай.
ТIехьарча шерашка керда хьаьлъяь а ягIачара къаьнаръяраш дIайоахаш царна когаметта кхыяраш хьалъеш а дукха ишколаш я вай мехка кердаяьнна. Хийцца ала йиш я цу ишколашкара дешара болх дика дIабода аьнна. Иштта Дошлакъа-Юрта хьалъяь ер керта йоккха ишкола а дега ма хетта товр долаш, наха пайдане а иразе а хургхиларах теша догдоагIа са.
ТIехдика дешаш, дунен тIара тIеххьара кхетам вай берашта хьалуш гIишло хийла цох. Воашка дар лораде а, боагIача боараме цу чу деша а аьттув балба вай.
№ 58 (11994), ера, 19 апрель, 2018 шу, четверг, 19 апреля 2018 года